Októberlok

Síðasti dagur októbermánaðar rann upp yndisfagur. Við nýttum því daginn og fórum í langan göngutúr - fyrst á róló, svo meðfram ánni, og loks í garðinn á Bowes Museum, þar sem Iðunn vildi ólm fá sér sundsprett í gosbrunninum, en snarræði eplapabba bjargaði henni, þó henni hafi fundist hann helst til afskiptasamur. Einkennilegt hve það er miklu meira spennandi að baða sig í skítugum og ísköldum gosbrunni en í stóra og fína ljónslappakerinu heima.
Vikan er búin að vera annasöm, aðallega bara þetta hversdagsstrit, en Helgi náði þó að fara í klippingu (loksins!!) og Iðunn fór í hrekkjavökupartí á leikskólanum. Megastuð! Við ætlum að reyna að taka því rólega þessa helgi því þetta er síðasta helgin okkar þar sem ekkert er í gangi fram að jólum! Erum samt á leið í eina heimsókn á morgun, hjá Alice vinkonu Iðunnar í Darlington, ekki langt að fara. Helgarnar fram á jólum líta svona út: Sheffield að hitta Grétu og Susan á kvikmyndahátíð; amma Gee og Diljá í heimsókn; Familían í Vín; mamma í Hanoi; mamma í Hanoi og Amma FK í heimsókn; afi Viðar í heimsókn......svo einhver jólapartí og ef við verðum heppin náum við heim fyrir jól. Nóg að gera!
Látum þetta nægja í bili - ætlum að gæða okkur á nýbökuðu rúsínubrauði.....

Indíáni

Stríðsmálning indíánastelpunnar var sem betur fer auðfjarlægð með sápu og vatni.

Sunnudagurinn langi

Hér var klukkunum breytt aðfaranótt sunnudags, og vetrartími genginn í garð, þ.e. sami tími hér og er heima á Íslandi. Haustdagur með roki og rigningu, svo lítið annað hægt að gera enn að dunda sér innivið. Fórum þó aðeins til Darlington í bíltúr og matarinnkaup. Mamman bakaði brauð sem féll vel í kramið á öðrum fjölskyldumeðlimum, og svo kveiktum við á kertum og nutum kvöldrökkursins sem féll strax um fjögurleytið. Allir voru uppgefnir eftir að hafa þurft að vaka klukkutímanum lengur en venjulega, og Iðunn litla endaði á að standa upp úr sæti sínu rétt fyrir klukkan 19, grípa snudduna sína og lýsa yfir að "Ijunn lúlla núna (með) teppi", dró svo ullarteppi og bakpokann sinn með sér upp stigann í átt að herberginu sínu. Þar sofnaði hún svo alveg útkeyrð, aldrei þessu vant án þess að vera i í gúmmistígvelum.
Myndin var tekin við morgunverðarborðið, að neðan má sjá hana í sama stól fyrir ári. Minna hár og meiri kinnar í okt 2008, en að öðru leyti ansi lík sjálfri sér.

Rigningardagur

24. október - (lang)afi Karl hefði orðið 98 ára í dag.


Rigningardagur í dag, en samt er öllum nauðsynlegt að fara út að fá sér ferskt loft - líka bangsa.


Fórum á rólóvöll og svo stillti Iðunn sér upp í haustlitadýrðinni, enn nóg af fallegum haustlaufum í Barnard Castle þó langt sé liðið á októbermánuð.


Svo var farið heim og litli listamaðurinn dundaði sér við listaverkagerð fram að kvöldmat - sem sagt tíðindalítill en ágætur dagur.

Í fréttum er þetta helst...

Hér hefur ekkert verið bloggað í 9 daga og mesta furða að ömmurnar séu ekki farnar að kvarta. Margar ástæður fyrir því - einna helst of mikil vinna eplamömmu og andleysi á kvöldin sem vinnunni fylgir. Eins vorum við í Cambourne fjóra af dögunum 9, í heimsókn hjá Þórði, Eyrúnu og börnum, sem við gistum hjá - og Söru, Davíð og strákum sem við áttum líka yndislegar stundir með. Sara var líka svo góð að gefa Iðunni tvær bækur, svo nú er til eitthvað nýtt að lesa fyrir svefninn. Svona erum við heppin að eiga vini sem eru með bókaútgáfu (Unga Ástin Mín).
Iðunni fannst svo gaman að vera innan um alla þessa krakka. Hún lék sér allan liðlangan daginn við Hrannar og Heiðar Þórðarsyni, og ekki spillti fyrir þegar Hávar og Alvar Davíðssynir bættust við. Hún skoppaði t.d. fram úr rúminu á þriðjudagsmorgun, hljóp fram á gang og kallaði hátt og snjallt "Halló krakkar!", og þá gall í litla gutta "Halló" innan úr sínu herbergi. Bara yndisleg, öll þessi börn. Hrannar, sá eldri var líka endalaust góður við Iðunni. Ég fékk hann með mér í að reyna að vinna á baðskelfingunni miklu sem hefur hrjáð Iðunni alveg síðan í sumar, og hann buslaði og hló af lífs og sálar kröftum og sýndi Iðunn hve gaman er að vera í baði. Það virðist hafa virkað, því eftir að hafa rætt mikið við mömmu um baðið og krakkana eftir heimkomuna á þriðjudag fékkst litla pæjan loks til að koma með mömmu sinni í bað, og eftir smá grát skemmti hún sér bara stórvel, og fór sæl uppúr eftir ansi langa stund, svo vonandi stendur þetta allt til bóta.


Á mánudaginn þurfti ég á fund í London, og þá nýttu Iðunn og Helgi tækifærið og skruppu í London Zoo, sem Iðunni þótti ansi merkilegur staður, þó hún hafi ekki kannast við alveg öll dýrin, enda hafa mamma og pabbi átt ansi erfitt með að finna út úr hvað sum dýrin segja - t.d. gíraffinn, og lamadýrið....
Myndir af heimsókninni suður í land má finna á myndasíðu Iðunnar sem linkað er á hér til hægri.

Af hundum og haustferðum...

Það er erfitt að vera hundaeigandi - maður þarf út í öll veður og passa að hann hreyfi sig nóg.


Hér er haustlegt sem stendur - suddarigning og birti varla einu sinni yfir miðjan daginn. Mamma, Iðunn og Briohundurinn eru þó vel viðruð, og ekki spillir fyrir að komið var við á róló.
Förum svo til Cambourne um helgina að heimsækja Þórð og Eyrúnu, Unni Söru, Hrannar og Heiðar. Grannar þeirra eru svo Davíð og Sara, Alvar og Hávar, sem einnig eru vinir okkar svo þetta ætti að verða skemmtileg helgi. Frá Cambourne förum við svo til London og gistum eina nótt því mamman er þar á ráðstefnu í Royal Society á mánudag og þriðjudag.
Nóg að gera!

Akksjon sjot!

Heimsókn til Donnu - mamma masar, Iðunn fékk djús


Rólóferð á Demesnes....


Gangurinn orðinn fínni.

Að auki klipptum við niður runna fyrir framan hús og undirbjuggum þannig veturinn - ekki seinna vænna, enda hætt að sjá út og litla daman hætt að geta kíkt eftir mömmu þegar von er á henni heim úr vinnunni.

Laugardagur í Darlington

Í gær skruppum við til Darlington að kaupa peysu handa Helga Pétri, sem er vart til frásögu færandi. Á leiðinni þangað keyrðum við fram hjá gamla vatnsveituhúsinu, og þar var þá opið hús, búið að koma öllum griðarstóru hundrað ára gömlu gufuvélunum af stað, og eins voru minni gufulestir og bílar til sýnis í garðinum. Verkfræðingurinn og fjölskylda hans gátu nú ekki látið þetta fram hjá sér fara, skelltu sér inn, og áttu saman góða stund á sýningunni í yndislegu haustveðri. Myndir á myndasíðunni. Þaðan var farið í stutta bæjarferð og pabbinn fékk peysu, og Iðunn nýja bók - stóru bókina hans Richard Scarry sem foreldrarnir áttu báðir í æsku. Vart þarf að taka fram að þetta er nú nýja uppáhaldsbókin á heimilinu.

Aftur komin helgi

Hér ríkir greinilega bloggleti.....voða lítið bloggað milli helga, aðallega vegna þess að mamman er alltaf uppgefin eftir vinnudaginn og lítið er tekið af myndum í haustmyrkrinu á kvöldin. Náði þó þessari af Iðunni að lesa umferðarreglurnar í vikunni.
Hið helsta í Iðunnarfréttum....bílferðir eru orðnar ABBA ferðir, meiji múshik mamma, meiji múshik.... Iðunn er líka hætt að vera hrædd við Mikka ref í Hálsaskógi og biður nú bara um meiji afi meiji músin gáta (vísar í vesalings Martein mús hræddan eftir ásókn rebba gamla og Iðunn heldur fram að hann sé að gráta). Iðunn er á fullu í "gera sjálf" skeiðinu svo allar athafnir á heimilinu taka nú helmingi lengri tíma en áður. Hún fær hrós í skólanum fyrir að vera duglegust að borða sjálf, og er með ákveðnar skoðanir á öllum hlutum. Yndislegust hún Iðunn okkar!

Nýjasta nýtt frá ömmuprjóni...

Hún Fanney prjónaamma er voða dugleg þessa dagana...hér má sjá eitt það nýjasta - fallega peysu á eplamömmu sem eflaust á eftir að gagnast vel í vetrarkuldum Barnard Castle (utan- jafnt sem innanhúss!). Amman ber samt ekki ábyrgð á fáráðasvip mömmunnar á myndinni hér að ofan. Takk takk takk amma Fanney!

Haust

Hér skall fyrsta haustlægð ársins á með stæl í gær - hífandi rok og rigning þegar við vöknuðum, en stytti sem betur fer upp um eftirmiðdaginn. Við tókum okkur smá skurk í endurskipulagningu innan dyra fyrripartinn, en fórum svo á bændamarkaðs- og rólórölt með Iðunni í guðveithvemörgum vindstigum. Nautasteik og kartöflugratín í kvöldmatinn og svo horft á Menn sem hata konur.....mjööög vel lukkaður dagur.

A personal chair

Eplamamma og eplapabbi brunuðu í IKEA í dag á meðan daman var í leikskólanum og versluðu ýmislegt sem vantaði á heimilið, svo sem gardínur í hjónaherbergi og fatahengi. Eins var löngu kominn tími á að daman fengi sinn eigin stól, eins og Dagur frændi heima á Íslandi. Iðunni finnst stóllinn æðislegur, og hentar vel til séríosáts og sjónvarpsáhorfs. Frekari fréttir af innkaupum á næstu dögum