Iðunn og eplin: apríl 2012

fimmtudagur, 26. apríl 2012

Ekki leikur veðrið við okkur og Bretana frekar en oft áður. Hér rignir og rignir og rignir....Iðunn hefur ekki notað aðra skó en stígvélin sín síðan við komum, og við erum öll orðin hálf gegnsósa, og enn sannfærðari um að allt sé best á Íslandi. Í dag rigndi svo mikið að vegum var lokað og við vorum heila eilífð að feta okkur heim eftir bakstigum Durham sýslu.

Iðunn fyrir utan leikskólann sinn

Annað er helst í fréttum að Iðunn er að fara að byrja á Yellow Wellies, gamla leikskólanum sínum sem hún hætti á í desember 2009. Við fórum í heimsókn á þriðjudaginn, og þó hún hefði verið smeyk í fyrstu glaðnaði yfir henni þegar hún sá dótið og eftir klukkutíma heimsókn með mömmu og pabba fékkst hún vart til að fara. Í dag fór hún svo og var ein í tvo tima og allt gekk vel; á morgun eru það þrír tímar, og svo er hún alveg byrjuð. Hún mun vera þarna 3 daga í viku, miðvikudag-föstudag, sömu daga og Alice vinkona sem hún er einmitt búin að fá að hitta og leika sér við í vikunni. Ég held að það muni vera gott fyrir hana að hafa börn til að leika sér við, þó það verði eflaust erfitt í fyrstu að vera hálf mállaus í skólanum - sérstaklega fyrir Iðunni mína sem er svo áköf að tjá sig.

Iðunn og Alice

Mamman er enn hálf ósátt við að vera farin að vinna, og sér það alltaf betur og betur hve samfélagið á Íslandi er betra fyrir fjölskyldulífið. Þrátt fyrir þetta fer þó ágætlega um okkur og Helgi er að standa sig vel í barnauppeldinu á meðan frúin er í vinnu.

Stelpur í mömmuvinnu

Gerður er glöð og góð að venju en alltaf óskup fegin að sjá mömmuna sína eftur eftir vinnudaginn. Spónamatur er aldrei jafn góður og mömmumjólk!

miðvikudagur, 25. apríl 2012

250412

Nýjar fílatöskur

240412

Dætur beinafræðingsins vekja kátínu heimamanna

mánudagur, 23. apríl 2012

Fyrsti vinnudagurinn

Nú er fyrsti vinnudagurinn liðinn. Allt gekk vel heima - Gerður borðaði og drakk; Iðunn á enn svoldið erfitt en hafði samt frá mörgu að segja þegar ég kom heim. Þau höfðu farið á róló og kaffihús. Ég náði að vinna vel þrátt fyrir vöðvabólgu og hausverk og var komin heim upp úr kl 16 (var mætt 07,40). Nú eru allir algjörlega búnir eftir langan og erfiðan dag - stelpurnar voru sofnaðar kl 19 og mig grunar að Helgi sé sofnaður líka. Á morgun er heimsókn á nýja leikskólann.....

Helgi var sofnaður!

230412

Komin heim úr vinnunni

sunnudagur, 22. apríl 2012

220412

Hani

Að vera algjörlega búin á því

Helgi fór til York á föstudags morguninn - við skutluðum honum á stöðina og eyddum svo deginum í að fara á tvo rólóa og skoða bakgarðinn og bakgötuna og ýmislegt annað dútl. Iðunn var með orkumesta móti enda er augljóst að hún er ekki alveg að fóta sig hérna í Englandinu. Hana langar bara aftur á Grænuborg og til vina og ættingja. Kl 15 var mamman orðin svoldið lúin , hlóð börnum og dóti í bílinn og lagði af stað til York - stelpurnar sváfu nær alla leiðina svo eyrun fengu smá hvíld.
Í York heimsóttum við Paul O´Higgins, konu hans Louise og Izzy (12 ára) og Maddy (9 ára). Iðunn er alltaf glöð að koma þangað enda til trampólín og stórar stelpur að leika við. Hún var þó ansi feimin í þetta sinn og lengi að ná áttum, en hresstist öll við þegar hún komst á trampólínið. Sólin lét meira að segja sjá sig í smá stund til að við gætum verið úti á svölum.

Svo var borðað og drukkið hvítvín og spjallað og stelpurnar sváfu vært, og vakað aðeins of lengi...því þær vöknuðu hressar um kl 6 að venju og mamma og pabbi voru ekki alveg eins hress.
Við dóluðum okkur heima hjá O´Higgins fjölskyldunni um morguninn en héldum svo til Durham. Fórum í bókabúð og keyptum afmælisgjöf, keyptum okkur snarl, borðuðum á bekk fyrir framan dómkirkjuna.

Héldum svo í afmæli til Eframs, sem er fjögurra ára og er sonur hjóna sem vinna með Unu. Ésús minn þvílíkt afmæli - fullt af börnum, hoppukastali og svo töframaður sem var svoooooooooooo lélegur og leiðinlegur og talaði allt of lengi svo að börnin voru alveg að gefast upp....svo var engin kaka...allt mjög skrýtið - en hoppukastalinn var skemmtilegur.
Við vorum algjörlega búin eftir þetta, og nú á sunnudagsmorgun erum við enn að jafna okkur. Ætlum að taka því rólega í dag - fyrsti vinnudagur á morgun. Það er uggur í eplamömmu.

laugardagur, 21. apríl 2012

210412

Staðið á höndum

200412

Kanína á pollabuxum

fimmtudagur, 19. apríl 2012

Ferðasaga með meiru

Nú er eplafjölskyldan komin aftur til Englands eftir ansi langa dvöl á Íslandi.
Munu því hér með hefjast að nýju hefðbundnar fréttafærslur, þó mynd dagsins haldi áfram.

Kaffi á Keflavík

Ferðalagið hófst ekki vel. Við þurftum að vakna kl 05 en rétt eftir kl tvö um nóttina vaknaði mamman upp og mundi að Gobba amma hefði fengið bíllyklana að samnýtta bílnum en bílstólar stelpnanna sem við þurftum til að komast út á völl voru enn í honum. Úbs! Ekkert í því að gera um miðja nótt en mamman svaf ekki mikið eftir þetta. Kl 05,30 kom amma Fanney að skutla út á völl, þá var hin amman vakin, Helgi skutlaðist eftir lyklunum, setti stólana í réttan bíl og við komumst af stað um sex leytið.
Ferðin út á völl gekk vel, eins flugferðin þó Gerður hafi verið ansi lúin og var farin að kvarta undir lokin. Eins og vera ber sofnaði hún ca. 5 min fyrir lendingu.... ekki mikill svefn þar.
Við fengum okkur kaffi á vellinum enda áttum við þar klst bið eftir lest, tókum svo lest beint til Darlington. Við áttum reyndar bara tvö sæti pöntuð, en í stútfullri lest vildi samt enginn sitja við hliðina á þessum íslensku sígaunum með tvö börn...svo við vorum með 4 sæti allan tímann. Þetta afskiptaleysi annarra skýrist þó etv af því að yngsti meðlimur fjölskyldunnar var nú alveg búin að fá nóg og öskraði eins og hún ætti lífið að leysa í amk 40 mín.

Kaffi í Manchester

Við komumst loks í hús eftir 10 tíma ferðalag og vorum ansi fegin að komast í 11 Victoria Road eftir langa fjarveru. Iðunn og Gerður skoðuðu dótið sitt, mamma og pabbi spjölluðu við nágranna. Maðurinn frá stórmarkaðnum kom nokkrum tímum síðar með matarinnkaup og aðrar nauðsynjar. Gerður sofnaði kl 18.45 alveg búin á því - vaknaði svo 50 min síðar alveg rugluð og var grét og grét...ekkert dugði til að hugga hana því hún skildi ekkert hvert hún væri komin. Loks um 8 var ró komin á...og klukkutíma síðar fóru einnig mamma og pabbi í háttinn...alveg búin.

Kaffi í Barnard Castle

Fyrsti heili dagurinn okkar hér fór svo í útréttingar - tryggja bílinn, sækja hann á verkstæði, heimsækja tvo rólóa, fara að versla, osfrv. Keypt voru m.a. sólgleraugu á báðar stelpurnar (og Laufeyju Lilju vinkonu Gerðar), þrátt fyrir endalausa rigningu. Á morgun verður haldið til York.