Góð kaup

Í dag fórum við til Darlington og gerðum ansi góð kaup.
Versluðum jólagjafir handa ýmsum, aðallega smáum vinum og ættingjum. Keyptum ECCO skó á Iðunni (2 nr of stórir, en ætlaðir til nota heima á Íslandi, yfir ullarsokka, en þó aðallega í vor þegar hún verður vonandi farin að ganga) á útsölu á 10 pund, bók handa henni á 2,99 pund; afmæliskjól á afmælisstelpu (allir muna náttúrulega laaaaaaangmerkilegasta dag desembermánaðar - 11.des - afmæli Iðunnar og Braga frænda!); ferðatösku til að koma jólagjöfum heim á Frón; og kerti til að lýsa upp vetrarmyrkrið.


Einnig sóttum við lestarmiðana hennar Eszterar sem við setjum í póst til London á morgun svo hún geti komið í heimsókn um næstu helgi. Við hlökkum öll mikið til enda orðið ansi langt síðan hún fór til Indlands í febrúar.
Húsfrúin er enn ómöguleg í öxlinni og getur hvorki lift dóttur sinni né ekið bíl, og Helgi hefur orðið að taka á sig öll heimilisstörf og alla barnaumönnun. Hann er samt drengur góður og kvartar ekki þó þetta sé náttúrulega ansi mikil vinna. Verra er að heimilið er enn undirlagt bókum og húsgögnum og Helgi einn getur ekki flutt stærstu húsgögnin. Ég vona bara að allt verði komið í lag áður en Eszter kemur eftir tæpa viku.
Annars er svo sem gott hljóð í okkur eins og alltaf - það þýðir ekki að láta svona smámuni á sig fá!

Myndirnar með póstinum eru honum algjörlega ótengdar, bara myndir af Sunnudagsmorgni í Victoria Road...nema myndin af mér og Iðunni að lesa nýju bókina...

Lammet og skrammet

Við fórum í yndislegan göngutúr í dag til Egglestone Abbey, sem sumir muna kannski eftir að hafa heimsótt þegar við giftum okkur. Dagurinn í dag var yndisfagur. Kalt og frost yfir öllu, en algjört logn og því unaðslegt að komast út í góða göngu. Við gengum meðfram ánni, heimsóttum hesta og skoðuðum endurnar, sérstaklega eina sem var búin að koma sér makindalega fyrir á miðri göngubrúnni yfir ánna Tees. Leiðin tilbaka gekk ekki eins vel. Í fyrsta lagi var Iðunn orðin lúin og farin að vola, svo við tókum hana úr bakpokanum og héldum á henni til skiptis í fanginu. Svo fór ekki betur en svo að ég rann í hálku og beint á rassinn í einni brekkunni (var samt að halda mér í handriðið mamma ef þú lest þetta!), með Iðunni í fanginu. Iðunn kom ekkert harkalega niður enda verndaði mamman hennar hana eins og móðureðlið segir til um, en henni brá ansi mikið og fékk hálfgert hysteríiskast. Verr fór fyrir mömmunni sem gat ekki borið fyrir sig hendurnar vegna barnsins og hélt svo fast í handriðið að tognaði á öllum axlarliðböndum í fallinu og handleggurinn því lítils nýtur sem stendur. Að auki er ég líklega með ansi ljota marbletti á rassinum og kom hnykkur á bakið sem gerir mig enn meira farlama. En Pollýannan í mér segir að þetta hefði allt getað farið verr, allir óbrotnir, göngutúrinn bara fínn þrátt fyrir þetta og gott að hafa fengið að njóta útiverunnar. Hitt er verra að enn er eftir að koma húsgögnunum á sinn stað - kannski við verðum að kalla út Daníel til hjálpar?
Fleiri eru illa leiknir í 11 Victoria Road - Tala kisa hefur lent í slag og er með ljótt sár á lendinni sem mér sýnist vera að koma sýking í. Líklegt að hún verði því að fara í sprautu á næstu dögum.
Þar með er lokið hrakfarafréttum úr Victoria Road.

Durhamdagur

Föstudagur og familían fór að venju öll saman til Durham.
Helgi ætti nú eiginlega að fá hraustleikaverðlaun fyrir að hafa leikið knattspyrnu í dag í nístingskulda og myrkri - vinir hans heima á Íslandi eru eflaust löngu búnir að skipta yfir í innibolta. Samkvæmt eigin frásögn var hann langbestur og skoraði langflest mörk!
Annars fór dagurinn okkar í Durham mest megnis í að setja upp og prófa ný tæki á labbanum mínum. Iðunn aðstoðaði. Allt komst í lag að lokum og labbinn er að fara að taka á sig endanlega mynd. Í öðrum fréttum er það helst að þegar við komum heim í kvöld var loks búið að klára gólflögnina í stofunni, svo við getum flutt aftur inní hana á morgun. Vonandi er ekki langt í að borðstofan verði tilbúin líka.
Góða nótt, og gleðilega helgi!

Stuttfréttir

Hér er enn ekki komið gólf en lítur út fyrir að verkefninu ljúki á föstudag. Þá er bara eftir að setja allt aftur á sinn stað. Úff!
Nýjustu fréttir eru að þriðja tönn Iðunnar er loks að koma. Hægri framtönn í efri góm. Mamman er samt svo vonlaus mamma að hún tók ekki eftir því fyrr en tönnin var komin í gegn og vel það.
Myndin að ofan sýnir það sem Iðunn hefur lengi vitað: ungar stúlkur eiga aldrei of margar duddur!

Hamagangur á Hóli

Lengi getur vont versnað, og nú er ástand heimilisins orðið slíkt að hér er varla líft. Eldhúsið er fullt af kommóðum, kistum hægindastól og skrifborði svo ekki er hægt að elda.


Flestir stólar eru inni á baði og Iðunn borðaði bæði hádegis- og kvöldmat við baðkerið, ansi sposk!


Bækur eru í stöflum um öll gólf, upp allan stigann, uppá borðum, undir borðum og svo framvegis, og við gerum ekki annað en elta Iðunni og forða verðmætum bókum. Lausn vandans var samt auðfundinn, hún fékk að hafa einu bókina sem aldrei er lesin og engum er annt um: Nýja Testamenti Gídeonfélagsins, og las hana af miklum ákafa - einkennilegt samt að þrátt fyrir næfurþunnan pappír hvorki beyglaði hún né reif eina einustu síðu. Kannski við séum að vanmeta þessa bók....



Helgi hefur orðið að vinna á stól úti í horni, en hann er þó svo heppinn að lítil aðstoðarkona hjálpar honum að halda við tölvuna á meðan.
Góðu fréttirnar eru þó þær að nú verður þetta líklegast klárað á morgun, og þá getum við byrjað að raða öllu aftur, og hver veit nema maður hendi ekki einhverju líka, svo heimilið verði snyrtilegra, smartara og örlítið mínimaliskara en það var fyrir viku.

Sunnudagur til sælu

McMaggi og Cristina eru búin að vera hjá okkur yfir helgina og búið að vera svo gaman að fá þau. Í gærkvöldi tóku þau því rólega með Helga og Iðunni á meðan ég söng á tónleikum, og svo skröfuðum við öll langt fram eftir kvöldi. Í dag tókum við svo daginn seint, fórum ekki út fyrr en um hádegi, eftir rólegan morgunmat og 2 könnur af kaffi. Röltum svo um bæinn okkar og sýndum þeim allt það markverðasta, Bowes Museum, miðbæinn, rólóinn, hænurnar og hestana, og enduðum loks á Old Well, áður en við fórum heim og bökuðum eplaköku. Yndislegur dagur. Nú tekur samt erfiðið við, því við Helgi verðum að tæma borðstofuna áður en gólfgaurarnir mæta í fyrramálið.

Laugardagsamstur

Stutt blogg í þetta sinn þar sem ég er svo voða bissí. Það er búið að leggja stofugólfið en borðstofan er enn eftir. Hins vegar er ekki enn hægt að ganga frá húsgögnunum eða taka myndir af kláruðu verki, þar sem eftir er að setja lista meðfram köntunum...smá misskilningur milli mín og smiðsins um hver mundi kaupa listana. Þetta varð allt til þess að við urðum að koma bráðabirgðastofu í gagnið og tæma dót úr gestaherbeginu í dag fyrir komu McMagga og Cristínar. Við þeyttumst þvi um allt sem hvítir stormsveiðit í dag. Verst er að það náðist ekki mynd af mér að þurrka af með Iðunni í bakpoka á bakinu. Ég fór á kóræfingu milli tvö og fimm, og á meðan verslaði Helgi í matinn og ryksaug. Nú er maturinn kominn í ofninn, von á gestum hvað á hverju, og klukkutími þar til ég þarf að fara út aftur að syngja á tónleikum.
Rólegri dagur á morgun, sem betur fer!

Hálfnað er verk þá hafið er.

Loksins loksins loksins er byrjað að leggja gólf í stofunni! Þeir sem ekki hafa komið hingað vita etv ekki hvað þetta er stórt skref. Þegar ég flutti í húsið fyrir 9 árum síðan hafði það verið í útleigu síðan 1975 og var í raun óíbúðarhæft. Fyrsta veturinn fór hitinn aldrei upp fyrir 13 stig innan dyra og ég sat öll kvöld í einu herbergi, undir sæng, í úlpu. Síðan þá er búið að skipta um alla glugga, miðstöð, baðherbergi og útidyrahurð, einangra loftið, mála öll herbergi, físaleggja eldhús, skipta um rafmagn, setja nýtt þak og rennur osfrv. Allt eftir því sem peningar söfnuðust í viðgerðasjóðinn. Eitt það fyrsta sem ég gerði eftir að ég flutti inn var að rífa upp öll illalyktandi pöbbateppi (lesist græn með bleikum rósum og óskilgreindum blettum...blearghh!!), og síðan þá hafa verið hér ber gólf, of léleg til að pússa upp, þakin málningarslettum og öðrum blettum, og vindurinn gnauðandi upp um fúgurnar. Ég sá alltaf fyrir mér nýju gólfin í hyllingum, en einhvernvegin þurfti alltaf að nýta þá peninga sem til voru í meira aðkallandi verkefni. En nú loks er kominn tími nýju gólfanna. Philip og Melvin mættu í morgun og lögðu hálft stofugólfið og ætla að klára á morgun. Á mánudag koma þeir svo aftur og taka borðstofuna. Jibbííjeiiiiii!!!! Hingað til gengur allt vel, eins og sjá má að ofan. Myndin að neðan sýnir hins vegar hvernig borðstofan lítur út þessa stundina - minnir svoldið á sambland af fornsölu og Little Shop of Horrors!


Iðunn tekur þessu öllu með stakri ró, og lætur sig hafa það þó hún þurfi að borða kvöldmatinn umkringd beinagrindum og bókastöflum.
Við viljum þakka kærlega fyrir kommentin við síðustu færslu, það er svo gaman að sjá hverjir kíkja hingað, jafnvel stutt komment eru skemmtileg! Stundum finnst mér eins og ég sé bara að blaðra eitthvað útí tómið, og það er traustvekjandi að sjá að einhverjir séu að lesa þetta blaður.
Góða nótt!

Kvitteríkvitt

Þetta er eitthundraðogfimmtugasti pósturinn á Iðunnarblogginu, og viljum við nota hann til að hvetja alla sem hingað koma til að kommenta og láta vita af sér, þó ekki væri nema í þetta eina sinn. Mér sýnist á teljaranum að hingað komi múgur og margmenni, en samt er það svo að oft líða margar margar færslur þar sem enginn kvittar nema ömmurnar. Þær eiga nú samt heiður skilið fyrir samviskusemi!
Annars er það helst að frétta að við Helgi erum búin að tæma stofuna fyrir gólflögnina á morgunog hlökkum mikið til að búa í húsi með almennilegum gólfum! Hvort við náum að koma öllu á sinn stað áður en Maggi og Cristina koma á laugardag er önnur saga.
Við erum öll farin að hlakka til að koma heim eftir tæpan mánuð. Getum ekki beðið eftir að hitta vini og kunningja og ekki spillir jólahátíðin fyrir, jafnvel á krepputímum. Það er spáð snjókomu hér um helgina svo vonandi kemur það okkur í rétta Íslandsgírinn.
Góða nótt - komum aftur með framkvæmdafréttir á morgun!

Gulrótarakurinn hennar ömmu Gee

Amma Gee er mikill gulrótabóndi og er endalaust að sá (Akursels)gulrótum í tilhlökkunarakurinn sinn. Nú getum við sáð í nýja spildu fyrir hana og aðra sem vilja hitta okkur því búið er að panta farið heim til Íslands í jólafrí. Við komum 18.des, og förum aftur 18. janúar svo þetta verður löng og skemmtileg dvöl á Íslandinu okkar. Verst er að ég er víst búin að lofa mér í sjósund með Örvari bróður....í desember/janúar...brrrrrrrrrrrrrrr!
A bientôt!

Vídjó

Ömmurnar voru að biðja um vídjó, og hér kemur það. Reyndar, eins og oft vill verða, lék daman ekki alveg listir sínar samkvæmt pöntun, en það er gaman að því samt, a.m.k. fyrir eitilharða Iðunnaraðdáendur. Við biðjum um að ekki sé hlustað allt of mikið á söng húsmóðurinnar sem er etv ekki upp á sitt besta!

Den der venter på noget godt, venter aldrig for længe

Fyrir um það bil tveimur mánuðum pöntuðum við burðarpoka fyrir Iðunni, svo við gætum nú komist í góða haustgöngutúra um sveitina. Ekki fór nú betur en svo að pokinn var uppseldur, og 6 vikum seinna var pöntunin endurgreidd þar sem ekkert gekk að fá vöruna frá framleiðanda. Við gáfumst samt ekki upp, og pöntuðum sama poka annars staðar frá, og loksins, loksins er hann kominn. Þetta er engin slorgræja - þægileg fyrir burðarkláfa jafnt sem reiðmanninn, og fínustu þýsku gæði á þessu öllu saman. Við Iðunn skruppum aðeins út að prófa pokann góða eftir vinnu, en hann reyndist þá næstum því of þægilegur, því ég var varla komin lengra en út á horn þá var daman sofnuð á baki, svo gangan varð ekki löng í þetta sinn. Til stendur að prófa græjuna frekar um helgina.

Sælar dömur - vansæll Helgi

Í dag var yndislegt haustveður svo við tókum nokkrar myndir af vestinu hennar mömmu til að amma geti skellt þeim á handavinnusíðuna sína. Svo fórum við á enn einn rólóinn og róluðum hátt hátt upp í loft - megastuð!! Við Iðunn skruppum til Donnu í smá heimsókn á meðan pabbinn fór heim að leggja sig, því hann er nú kominn með 12 tíma magapestina sem við Iðunn fengum í síðustu viku - vonandi fer þessari veikindaþrautagöngu brátt að ljúka, við erum orðin ansi leið á henni!
Iðunn er voðalega ánægð með skóna sína og er alltaf að dást að þeim. Henni finnst samt ennþá svoldið erfitt að standa upp í þeim, líklegast vegna þess að þeir eru ansi mikið of stórir, en það hlýtur að venjast. Þegar hún er einu sinni staðin á fætur gengur henni þó voða vel að standa og ganga með hlutum, nema þegar hún gleymir sér við að dást að fótunum á sjálfri sér!
Rólegheitahelgi næstum búin og nú tekur við mikil verkefnavika - tæma þarf herbergi og flytja húsgögn fyrir gólflögnina í vikulokin.
Toodiloo!

Nú er Iðunn á nýju skónum.......

Merkisdagur í dag. Iðunn fékk sína fyrstu skó! Okkur reyndist reyndar erfitt að finna skó sem uppfylltu kröfur foreldranna - sem sagt mjúkir, fallegir í sniðinu, vel saumaðir, og fótlaga (ekkert mál enda barnaskóbúðir mjög góðar í UK), ekki of strákalegir og ALLS EKKI bleikir. Það var síðasta atriðið sem reyndist okkur erfiðast. Hér er bókstaflega ekkert til á stelpur, hvorki skófatnaður né annar klæðnaður, sem ekki er bleikt. Eins er mjög erfitt að finna skó á dömur sem nota nr 17. En þetta hafðist allt að lokum, þó við höfum endað með þá aðeins við vöxt (nr 18). Þessi kaup boða upphaf ævilangra fjárútláta ef hún sver sig í móðurættina (eða amk ömmu Gee). Daman er voða ánægð með skóna, og vingsaði fótunum hátt hátt upp í loft í kerruferðinni milli búða eftir að skórnir voru komnir á fæturna - augljóslega miklu meira stuð að sveifla fótunum með svona fína skó, og eins varð alltaf að virða fyrir sér herlegheitin í hverri sveiflu.

Föstudagsromsa

Ég er að hugsa um að hætta að segja af okkur heilsufarsfréttir því þær eru svo niðurdrepandi...skulum bara láta okkur nægja að segja að ég varð að vera heima í dag vegna þess að ég var of lasin til að fara til vinnu, og þarf nú ansi mikið til til að ég játi mig sigraða.
Iðunn pæja er aftur á móti eitilhress. Starfsfólkið á leikskólanum var að segja okkur hvað hún er alltaf góð og meðfærileg, og segja að þó hún sé svona lítil ennþá er hún eitt af best aðlöguðu börnunum á skólanum öllum. Reyndar er gott að vera svona medfærileg, því að launum fær Iðunn oft að fara með í útréttingar, t.d. með stóru krökkunum á bókasafnið, eða sækja skólakrakkana í eftirskólaklúbbinn og annað sem henni þykir skemmtilegt. Hún fær líka mikla athygli frá starfsfólki og krökkum sem finnst gaman að vera með henni. Annar vinsæll fjölskyldumeðlimur er Helgi, sem fær mikið hrós fyrir vinnuna sína í Hull, enda er að renna upp fyrir þeim það sem amma Fanney hefur alltaf haldið fram, að hann er mikill snillingur!
Nú standa til stórframkvæmdir í næstu viku - Philip smiður ætlar að koma og leggja gólfin í stofu og borðstofu á fimmtudag og föstudag, og til að það sé hægt verður að færa öll húsgögnin, og mörg þúsund bækur. En kannski verður það til þess að maður losi sig við eitthvað óþarfa dót. Allt verður svo að vera tilbúið eftir hádegi á laugardag því þá koma Maggi vinur hans Helga og Kristina konan hans í helgarheimsókn frá Glasgow - það verður gaman að hitta þau aftur!

Hulda Sóley þriggja ára!!!!!!

Í dag á Hulda Sóley frænka Iðunnar og nýorðin stóra systir þriggja ára afmæli. Hulda er dugleg að hugsa um lítil börn (þó þau hagi sér ekki kannski alltaf eins og hún vildi helst!), og óskum við henni því til hamingju bæði með daginn og litla bróður. Við vitum að hún á eftir að spjara sig vel sem stóra systir og fyrirmynd....ef hann bara getur vanist á að vilja bæði teppi og kodda ;-) Til hamingju með afmælið, elsku Hulda Sóley!

Helgi endurheimti loks 5. útliminn í dag. Eftir að hafa verið tölvulaus síðan hann fór frá Marel, leyfði fjárhagurinn loks kaup á vinnutölvu fyrir heimilisföðurinn, og hann er heill á ný. Gripurinn heitir HP6930p og er alls ekkert ómyndarlegur. Hér hafa farið fram forritainnsetningar og aðrir gjörningar í allan dag, og nú er sælubros að færast yfir andlit Helga eftir því sem hann finnur sig betur og betur í veröldinni, sem er öll önnur og betri eftir tölvukaupin.

Iðunn átti líka góðan dag á leikskólanum. Eftir veikindi síðustu viku sagði Hayley mér að Iðunn hefði verið algjörlega fullkomin í dag (just perfect!). Fannst mér sætast hvernig hún hefur víst verið að ferja leikföng í litla dömu sem einungis er 5 mánaða og getur enn ekki setið eða náð í sitt eigið dót - alltaf þegar hún var aðgerðarlaus kom Iðunn og rétti henni eitthvað nýtt til að leika við. Æ, þetta er yndisleg stúlka sem við eigum og við erum svo stolt af henni!

Iðunn stóra frænka!

Í heila ellefu mánuði hefur Iðunn verið minnsta barnið í fjölskyldunni, og okkur finnst hún ennþá svoldið peð, þó hún sér náttúrulega ansi kná og dugleg stelpa. Hins vegar hefur henni nú verið steypt af stallinum því í dag fæddist lítill drengur Kristbjarnarson, frændi Iðunnar, og Iðunn því ekki lengur minnsta barnið, heldur stóra frænkan! Við óskum Bjössa, Gunnu og Huldu Sóleyju til hamingju með strákinn sinn og hlökkum mikið til að sjá hann um jólin.
Ömmurnar voru víst orðnar leiðar á rólumyndum og því höfum við breytt um leiktæki á Iðunnarmynd dagsins, sem sýnir heimasætuna í einhvers konar nethring. Við fórum á stúfana í dag og leituðum uppi nýjan róló sem við höfum aldrei komið á, og eru nokkrar myndir þaðan á myndasíðunni líka. Annars var hráslagalegt, hvasst og nístandi kalt í dag svo við vorum ekkert sérstaklega lengi úti. Það er eins gott að búið er að kaupa vetrarflíkur á barnið!

Enn meiri afslöppun

Í dag hefur verið suddarigning í eiginlega allan dag, kuldi, vindur og hráslagalegt veður. Því var aldrei þessu vant ekki farið á einn einasta róló. Hins vegar borðuðum við matarmikla kjötsúpuafganga í hádeginu, kíktum svo við hjá Donnu og drukkum kaffi með henni, og svo bökuðum við eplaköku (með eplum úr garði Donnu) þegar heim var komið og borðuðum hana volga eftir hádegi. Nú sitjum við hér við kertaljós, með kökuilm í húsinu, gölluð í lopapeysur og lopavesti og njótum haustsins. Það getur bara verið ansi kósí að taka haustið með trompi af og til.

Rólegheit

Það er yndislegt að geta átt rólegann dag. Kósíheit í náttfötum fram undir hádegi, rölt svo út í gönguferð um safngarðinn við Bowes Museum, kaffisopi á Costa, (róló!,) og svo íslensk kjötsúpa í kvöldmatinn. Iðunn sofnuð sæl og glöð, foreldrarnir afslappaðir með smá rauðvín, og efni til í eplaköku á morgun. Unaðslegt líf!

Stuð!

Svona er gaman að skoða sjálfa sig á skjánum! Iðunn og mamma í vefmyndavélinni.

Loksins, loksins komin helgi!

Þessi vika virðist hafa verið óvenjulega lengi að líða, enda allir frekar illa upplagðir, og ferðalög helgina á undan urðu til þess að maður hóf vikuna lúin....og er nú algjörlega örmagna. Planið er að gera sem allra allra minnst næstu daga, enda veðurspáin léleg....vera kannski bara í náttfötunum fram á eftirmiðdag og í mesta lagi fara í smá göngu með heimasætuna. Iðunn var heima með pabba sínum í dag, og var svo heppin að farið var á uppáhaldsstaðinn - Barböruróló! Það þarf ekki mikið til að gleðja lítið hjarta - nokkrar rólusveiflur eru nægar til að lyfta deginum upp á hærra plan!

Ljósmyndaleysi í skammdeginu

.
Ég verð eiginlega að biðjast afsökunar á hve fáar myndir birtast á Iðunnarsíðum þessa dagana. Á virkum dögum er ég aldrei heima í dagsbirtu og það er svo óskaplega leiðinlegt að taka myndir með flassi - litirnir og myndirnar verða bara ómögulegar. Ég reyni samt alltaf að ná svo sem eins og einni mynd til að setja þó inná bloggið, og þarf samt oft ansi margar til að ná einni skaplegri, og aldrei eru neinar aflögu til að setja á myndasíðuna. Ég hef samt alltaf á samviskunni að ég sé ekki að sinna myndasíðunni nóg, enda ætti náttúrulega að vera auðvelt að fylla margar síður af myndum af svona fínni dömu....ég verð bara að játa að í vetrarmánuðum er ég ekki manneskjan til þess. En alveg að koma helgi og með henni vonandi skaplegri myndir.

Af kommentum/athugasemdum er það að frétta að vandamálin virðast vera upprunnin hjá Google, og svo fremi sem menn halda sig við nafnleyndina ætti að vera hægt að setja athugasemdir hér að vild. Eins er hægt að skrá þær undir gmail notendanafni.

Remember remember the fifth of November....

Hér er ástandið enn heldur lélegt. Iðunn er enn með hósta og lystarlítil, og ég með hita, hósta og almenna vanlíðan. Helgi, sem hefur verið veikur lengst er ansi mikið skárri en alls ekki algóður. En maður verður bara að harka þetta af sér eins og annað. Iðunn er búin að vera svo heppin í dag að hún var eina barnið á ungbarnadeildinni, og fékk því að hafa Hayley sína alveg út af fyrir sig, og verður víst eins á morgun. Hún fær samt að fara inn á eins árs deildina að leika við stærri krakkana, en er með Hayley sem sinn einkakennara allan tímann, sem er ágætt núna þegar hún er svoldið lítil sér. Annars held ég henni sé svoldið íllt í hálsinum sínum, því grautar, jógúrt, brjóstamjólk og mauk er vinsælla en venjulegur heimilismatur, sem hún hefur annars alltaf viljað frekar. Í kvöld hámaði hún í sig heitan graut og brjóstamjólk og varð öll hressari fyrir vikið, svo ég hugsa að ég segi bara leikskólanum að gefa henni jógúrt (sem er yfirleitt eftirmatur en ekki aðalmáltíð í skólanum) á morgun ef hún vill ekki annað svo hún fái nægan mat í magann sinn.

Smá þroska punktur: Iðunn hefur lengi viljað hjálpa til við að klæða sig úr fötunum, en í dag reyndi hún í fyrsta sinn að klæða sig sjálf í sokka - hún lagði reyndar alltaf sokkinn bara ofan á tásurnar og skildi ekkert í því afhverju hann hélst illa á fæti - men det er tanken der tæller!

Aðrar fréttir eru þær að á meðan Kanarnir hylla Obama brenna Bretarnir Guy Fawkes í dag.......þó lítið sé um bálkesti og flugelda hér í Barnard Castle, sem er kannski eins gott þegar litlar dömur eru að reyna að sofa á sitt græna.....

Remember remember the fifth of November
Gunpowder, treason and plot.
I see no reason why gunpowder, treason
Should ever be forgot..

Komin til pabba!

Það var ansi glöð lítil stelpa sem knúsaði pabbann sinn á flugvellinum í Glasgow í gærkvöldi. Og þó hann hafi borið sig vel og líklega notið piparsveinalífsins að einhverju leyti var það samt ansi sæll pabbi sem sótti okkur eftir viku aðskilnað. Við Iðunn náðum lítið að hitta fólk vegna veikinda, enda átti Iðunn ekki nema einn hitalausan dag allan tímann sem við vorum á Íslandi, en við sáum ömmur og afa, og flesta allra nánustu ættingja, og Iðunn fékk að knúsa og spjalla við ömmurnar sínar sem annars búa bara í símtólinu. Við fötuðum hana upp af almennilegum vetrarfatnaði, sumt nýtt, annað gefið af öllu því góða fólki sem er í kringum okkur, og amma Fanney prjónaði tvö ný lopavesti á Iðunni og eitt á mig. Við ætlum að taka myndir af herlegheitunum einhverja næstu daga svo amma geti sett þær á prjónamontssíðuna fínu.
Annað er helst að frétta að í dag kom smiður og gerði við rennufjandann sem hafði eyðilagt undan sér múrverkið. Við sömdum einnig við hann um gólflögn fyrir mánaðamót og herbergissmíð um jólin.
Iðunn er öll að hressast og fer á leikskólann á morgun...mamman skipti við hana og er nú orðin slöpp, en verður þó líklega að mæta í vinnuna til að vinna upp letilífið á Íslandi síðustu daga.