Loksins loksins kom jólasnjórinn!

Mikil var gleðin á Grundarstígnum í morgun þegar við litum út um gluggann og sáum jólasnjóinn. Betra seint en aldrei, enda margir jóladagar eftir enn! Iðunn fór í fyrsta sinn á snjóþotu og fannst það rosalega mikið sport. Enn betra var svo þegar mamma og pabbi fóru með hana á Arnarhól og renndu sér þar niður brekkur - þvílíkt stuð! Meija njó meija njó söng heimasætan og hámaði í sig snjóinn!

Gleðileg Íslandsjól!

Við óskum öllum lesendum Iðunnarbloggsins gleðilegra jóla og farsæls komandi árs. Mikið er yndislegt að vera komin heim til Íslands!

Bloggleysi

Hér hafa veikindi hamlað bloggskrifum. Eplamamma hefur verið lasin og lenti á spítala í fjóra daga, eftir ansi marga veikindadaga heimavið. Iðunn og pabbi hafa því þurft að bjarga sér sjálf síðasta hálfa mánuðinn - Helgi stóð sig auðvitað vel i heimilisstörfunum, en lýsti því yfir í dag hve hann er feginn að vera ekki einstæður faðir!
Á tímabili virtist sem við kæmumst ekki heim fyrir jól, en sem betur fer fór mamma gamla að skríða saman um helgina og er nú komin heim í Victoria Road, daginn fyrir heimferðina. Morgundagurinn verður eflaust strembinn, en mikið held ég að við verðum fegin þegar við lendum loks á Keflavík annað kvöld!

Iðunn tveggja ára!

Elsku yndislega Iðunninn okkar á tveggja ára afmæli í dag. Fallega stelpan okkar sem veitir okkur svo ómælda gleði og kemur okkur stöðugt á óvart með skemmtilegheitum og endalausum gáfum (eins og hún á náttúrulega kyn til í báðar ættir). Dagurinn byrjaði á leikskólanum - pabbi hafði bakað fína súkkulaðiköku sem allir fengu að smakka, og það voru ansi margir súkkulaðiklístraðir munnar á Bangsadeildinni þegar við komum að sækja dömuna eftir hádegismatinn. Mamman er nefnilega lasin með mikinn hita og treysti sér ekki til að vinna lengur eftir að hún var búin með kennslu dagsins.
Þegar heim var komið voru opnaðir pakkar - Iðunn fékk fínan kjól og bangsa frá afa og ömmu í Sólskinsgötu, inniskó frá ömmu Fanneyju, og dúkku frá Donnu. Mamma og pabbi höfðu pantað gjöf á netinu en því miður tókst ekki betur til en svo að gjöfin kom ekki í tæka tíð. En kannski er bara meira gaman að dreifa pakkaopnuninni á fleiri daga!

Að neðan má sjá Iðunni þennan sama dag í fyrra, og í hitteðfyrra - aðeins minni, en alltaf jafn yndisleg!

Komin frá Hanoi

Eplamamma er komin frá Hanoi eftir langa og strembna, en jafnframt skemmtilega ráðstefnu. Hanoi var skemmtileg borg og mannlífið ansi áhugavert. Sérstaklega var umferðarmenningin framandi - ég sá flest 5 manns á einni vespu, og eins sá ég mann með ca. 40 gullfiska, sinn í hverjum plastpokanum hangandi af grind á reiðhjólinu sínu. Framandi þjóðfélag, en fólkið yndislegt og maturinn góður - væri alveg til í að koma þangað aftur!


Iðunn var voða glöð að sjá mömmu sína, og er búin að vera mikil mömmustelpa í allan dag, þannig að það er eins gott að mamman gat tekið sér frí. Vinnudagur á morgun að venju. Í fjarveru minni hafði amma Fanney komið og létt undir, og jafnframt fært heimasætunni vettlinga og lambhúshettu sem ekki veitir af hér í Durham. Rigning og trekkur í dag.
Nóg í bili. Er ansi andlaus eftir 50 svefnlausar stundir...

Fórum til York

Það var stuð.

Amma FK komin

jamm

Iðunnarsakn

Mamman er nú ansi fjarri Iðunni, komin alla leið til Víetnam...búin að vera á ferðinni síðan á föstudag, og enn heil vika þar til hún kemur heim. Við erum samt búin að vera duglegar að skæpast....það er alveg yndislegt að eiga þó möguleika á að skrafa saman í gegnum netið. Annars gengur allt vel hér - skemmtilegt fólk, flott hótel, framandi mannlíf....góður matur. Frekari fréttir þegar ég kem heim.
Hanoieplið

Stund milli stríða 2!

Við erum komin heim frá Vín eftir yndislega daga í óvenju hlýju veðri. Helgi var fyrst einn í heimsborginni við kynningu á forritinu sínu og tókst víst mjög vel upp. Allir ánægðir og mikið gaman. Við Iðunn vorum ekki alveg eins hressar, báðar með einhverja smá lumbru, en nutum nú samt ferðarinnar. Reyndar byrjaði ferðalagið ekki vel, því við fórum með lest til Gatwick og gistum þar áður en við fórum í flug. Lestin var vatnslaus og því búið að læsa öllum klósettum, og lestin of full til að hægt væri að finna laust sæti til að skipta á litlum dömum, ekki fór betur en svo að Iðunnin var orðin gengdrepa þegar við komumst loks á Gatwick. Þar tók ekki betra við, því þegar Iðunn loks var sofnuð upphófst mikill skarkali, og var þá maðurinn í næsta herbergi að lumbra ansi harkalega á eiginkonunni....eplamamma hringdi út allt tiltækt lið... sem kom á staðin og stillti til friðar...en eftir þetta allt saman var lítið sofið...sérstaklega þar sem vekjaraklukkan hringdi klukkan 4 til að koma okkur út á völl í flug.

En þegar til Vínar var komið var bara yndislegt. Fengum lánaða fína íbúð miðsvæðis hjá Katrínu vinkonu minni. Hittum Eyþór yndislega eitt kvöld á bar sem var skreyttur myndum eftir Dieter Roth, þó enginn vissi hvers vegna (ég spurði!). Fórum á jólamarkað með Katrínu og fjölskyldu. Röltum um bæinn og upplifðum stemmninguna. Settums á Ugluhreyðursvínbarinn og ræddum við eigandann sem er vinur Grétu og Susan. Fórum í dagsferð í sveitina að hitta Katrínu í nýjum heimkynnum og eiga góðar stundir með nýja vini okkar honum Vincent litla. Fórum í dýragarðinn að skoða skemmtilegar skeppnur með stelpunni okkar. Myndir af þessu öllu má sjá á myndasíðunni hér til hliðar.

Nú erum við komin heim. Eplamamma þarf að skipta skjótt um í töskunum, enda fer hún til Hanoi á föstudag, en sem betur fer kemur amma fanney á mánudaginn til að létta undir með Helga og skemmta Iðunni.
Nóg að gera á þessum bæ!!

Stund milli stríða

Við mæðgurnar höfum það gott hér í Victoria Road, þrátt fyrir að pabbann vanti. Iðunn er reyndar búin að vera að spyrja hvar pabbi sé, og loks sættumst við á að pabbi væri í flugvélinni. Hún er búin að tala mikið um að Iðunn og mamma verði nú að fara í flugvélina líka, sem stendur reyndar til, en mamman hefur gefið lítið út á það hingað til, því allt sem maður lofar á þessum bæ verður helst að standast innan næstu tveggja mínútna!
Á morgun leggjum við svo af stað til fundar við Helga. Iðunn fer á leikskólann og svo sæki ég hana um 3 eh og þá keyrum við til Darlington og tökum lest til London, og þaðan til Gatwick. Gistum þar um nóttina og svo með flugi til Vínar einhverntíma um 6.30 fyrir hádegi á laugardag. Það er náttfatadagur í leikskólanum á morgun, svo það verður gaman að sjá svipinn á lestarfarþegum og hótelgestum þegar Iðunn birtist í kuldaskóm og náttfötum - en á móti kemur að þetta eru ábyggilega þægileg ferðaföt, og ekki þarf að taka sig til fyrir háttinn þegar við komum loks á hótelið, sem verður eftir venjulegan háttatíma hjá dömunni.
Vonandi getum við bloggað eitthvað frá Vín.
Toodiloo! Una og Iðunn ferðalangar

Hér má bæta við smá Iðunnarsögu: Aðfaranótt gærdagsins gerði hræðileg vatnsveður, og rigndi enn þegar við Iðunn keyrðum í vinnuna um morguninn. Undir birtingu sitjum við föst á ljósum og þá rekur Iðunn augu í hóp u.þ.b. 60-80 blauta stara sem sitja í hnipri á þakskeggjum nærliggjandi húsa. Hún vildi endilega benda mér á þetta: Mamma mamma, bíbíar gráta rigningunni! Snillingur hún Iðunn!!