Sjálfstætt fólk

Iðunn er sjálfstæð dama. Hún getur klætt sig í húfu. Hún getur klætt sig úr peysunni. Hún getur staðið upp sjálf. Hún getur klifrað yfir fólk frekar en að skríða í kringum það.....og...Hún "getur" borðað sjálf. Matartímar hér eru orðnir ansi subbulegir. Meiri tími fer í að þrífa gólfið en elda matinn, og mamman á erfitt með að sitja á sér á meðan hún lætur barnið æfa sig í sjálfstæðinu. Eflaust væri auðveldara að láta leikskólann um matarþjálfunina, en mér fyndist það halfgerð uppgjöf, svo í lok matartíma fær Iðunn aðeins að æfa sig. Látum nægja að segja að hún á enn ansi langt í land að geta séð sjálfri sér fyrir daglegum hitaeiningafjölda með þessari aðferð. En það er voða stuð að borða sjálf, og maturinn eflaust miklu betri þannig!
Annars er allt gott að frétta. Fórum öll til Manchester á mánudag á formfræðifund - 5 tíma ferðalag allt í allt sem reyndi á okkur öll en gekk samt furðu vel. Iðunn er að taka tennur (höldum við) og búin að vera Iðunn öfugsnúna í gær og í dag; og Helgi fór til Hull í dag og átti góðan fund með öllum hinum tölvusnillingunum.
Góða nótt!

Örvar afmælisdrengur!

Það er nóg að gera í afmælum þessa helgi! Í dag á hann Örvar bróðir Unu og frændi Iðunnar afmæli. Reyndar er hann Örvar svo fit eftir öll langhlaupin síðustu mánuði að hann er frekar að yngjast með hverjum deginum, og ekki spilla sjóböðin - allt þetta kalda vatn er svo gott fyrir húðina! Til hamingju með daginn elsku Örvar okkar!!!!

Thomas og Jill

Hér gleymdist að geta þess að á föstudag fórum við öll í brúðkaup hjá Thómasi og Jill Cucchi. Fámennt en góðmennt og yndislega gaman hjá okkur öllum. Fyndnast var samt þegar brúðguminn varð svo hrærður að hann gleymdi nafninu sínu. Iðunn gerði mikla lukku á pöbbnum eftir vígsluna, en því miður var hún aðeins of lúin eftir leikskólann til að við kæmumst í matinn á eftir. Von er á baby Cucchi eftir 3 mánuði svo Thómas er búinn að æfa sig á Iðunni....henni finnst hann svoooo skemmtilegur! Óskum við Monsieur et Madame Cucchi til hamingju með daginn.

Langþráður laugardagur

Langþráður laugardagur loksins lentur. Náttföt fram að hádegi. Göngutúr í köldu og björtu veðri. Rólóferð og óteljandi hundar á leiðinni. Smartjakki keyptur á kostakjörum handa húsbóndanum. Kaffi á Costa í rólegheitum. Neðri hæðin tekin í gegn svo frúin hætti að stressa sig á óreiðunni. Reyktur fiskur í kvöldmat. Kertaljós og kósíheit hjá hjónakornunum eftir háttatíma heimasætunnar. Gaman núna!

Jóhannes afmælisbarn!

Hann Jóhannes mágur á afmæli í dag. Þessi stórskemmtilegi maður, vafasami bloggari, frábæri kokkur og úrvals veislustjóri fær hér með hamingjuóskir frá okkur öllum í Victoria Road. Til hamingju með daginn!!!

Búsáhöldin barin

Litli byltingarsinninn lætur ekki sitt eftir liggja í lýðræðisbaráttunni. Hún ber potta með sleifum rétt eins og Austurvallarmótmælendurnir, og hávaðinn er svo mikill að hann heyrist ábyggilega alla leið til Reykjavíkur!

Roðinn í austri

Hér í Victoria Road fylgjumst við með ástandinu á Íslandinu góða af miklum áhuga.....verðum að viðurkenna að sósíalistahjörtun slá hraðar þegar þjóðin rís loks upp í byltingarhug....
Minnsti sósíalistinn er samt svoldið lítil sér í dag.....breytingar síðustu daga farnar að hafa áhrif og hún á í erfiðleikum með að átta sig á hlutunum og því var ansi erfitt fyrir örmagna stelpu að sofna í kvöld. Í skyldum fréttum er von á smiðum hingað í vikulokin að klára stelpuherbergið svo það lítur út fyrir að við getum komið á stabílu umhverfi fyrir heimasætuna innan næstu tveggja vikna (eigið herbergi, engin ferðalög, engir húsgagnaflutningar)...þá mun taka við svefnþjálfunin mikla....
Við óskum byltingarsinnuðum Íslendingum góðrar nætur.

Rútínudagur

Í dag var fyrsti dagur Iðunnar á leikskólanum í rúman mánuð og allt gekk vel. Daman muldraði aðeins þegar átti að skilja hana eftir, en var búin að jafna sig áður en ég komst út úr húsinu, og þá tók víst við endalaus leikur og gleði og bara voða skemmtilegt að vera komin aftur til krakkanna - mér skilst að hún hafi brosað út að eyrum allan daginn, sem er náttúrulega bara yndislegt. Helgi fór til Hull og átti góðan dag þar, og ég kenndi þriðja árs nemum allt um neanderdalsmenn.
Þegar heim var komið þurfti mikið að stússa við að keyra Elvis í vagninum um alla stofu, áður en örþreytt lítil dama sofnaði á 2 mínútum í rúminu sínu eftir langan og skemmtilegan dag.

Iðunn og eplin snúa aftur

19.janúar, afmælisdagur (lang)ömmu Stínu

Gleðilegt ár!
Þá erum við komin aftur til Englands eftir heilan mánuð á eyjunni fögru. Ferðalagið gekk svona so-so......eða eins vel og hægt er þegar lítil dama ælir yfir mömmu sína einu sinni á leiðinni til Keflavíkur og þrisvar á leiðinni til Stansted. Ég þakka bara fyrir að hafa lent á skilningsríkum flugfreyjum, og að amma Fanney hafi verið tilbúin til að þrífa illalyktandi polla úr bílnum sínum eftir ömmustelpuna.
Við áttum alveg yndislega daga á Íslandi. Hittum marga en því miður ekki alveg alla. Skoðuðum slatta af nýjum börnum, þar á meðal Maríu Dís hjartastelpu og tvíbura Þórhalls og Hildar. Nutum þess að taka lífinu með ró og eiga góðar stundir saman sem fjölskylda og leyfa stelpunni okkar að kynnast öllu þessu góða fólki sem í kringum okkur er. Iðunn dafnaði eins og blómi í eggi við alla þessa athygli og tók risa stökk fram á við í þroska. Mamman naut þess í botn að fá smá frí frá myndavélinni og Iðunnar blogginu og er til í slaginn á ný.
Nóg í bili, meira á morgun.

Fjarvera

Hér verður líklega lítið bloggað næstu daga - ég fer til Spánar eldsnemma á sunnudagsmorgun, og kem ekki aftur fyrr en eftir hádegi á miðvikudag. Á meðan munu feðginin hafa það náðugt heima. Svo rétt næ ég að skipta um í töskunum áður en við förum heim til Íslands á fimmtudagsmorgninum. Ég verð að játa að það er einkennileg hugsun að fara í fyrsta sinn frá stelpunni sinni yfir nótt þó ég viti að hún verði í góðu yfirlæti hjá pabbanum sínum. Mér finnst þetta líka helst til löng fjarvera, svona í fyrsta sinn.
Bless í bili....