Leikskólafréttir

Hér koma örfréttir af Iðunni leikskólastelpu.
Iðunn fór á skólann sinn í dag, í fyrsta sinn í sjö vikur. Hún var voða spennt á leiðinni - talaði endalaust um krakka og dót og róló og annað því um líkt. Þegar á hólminn var komið varð hún samt pínu feimin og fékk dúkkuna með ser, svona til halds og trausts. En hún knúsaði samt fóstruna og kyssti mömmu bless án þess að kvarta. Það var bara mamman sem táraðist þegar hún horfði á eftir stelpunni sinni svo svakalega duglegri en samt með dauðahald á dúkkunni sinni. Allt gekk vel í dag, hún lék sér víst með dúkkur og tilheyrandi í allan heila dag, alltaf glöð og sæl, og borðaði allan matinn sinn upp til agna. Leikskólavist er alltaf erfiðari fyrir mömmur en börn.

Barnard Castle

Fjölskyldan er komin til Barnard Castle - við verðum hér í 10 daga í þetta sinn en þá förum við Iðunn aftur til Íslands í tæpan hálfan mánuð. Ferðin hingað gekk vel, þrátt fyrir "smá" stress á Glasgow þar sem við höfðum ekki ætlað okkur alveg nægan tíma í flugvélaskipti,sérstaklega í ljósi lengstu passasköðunarraðar sem ég hef á ævi minni séð.....hleypt var inn í hollum. En eftir hlaup eftir löngum löngum göngum, með Iðunni dinglandi í mömmu og pabba örmum, og "Would the final 3 remaining passengers to Newcastle please make their way IMMEDIATELY..." glymjandi í eyrunum náðum við vélinni!
Við vorum svo uppgefin eftir þetta allt að eplamamman var komin í rúmið fyrir klukkan átta og eplapabbi einungis klukkustundu síðar! Mamman fór svo í vinnu sína í morgun, en veslings pabbinn kom engu í verk því ógerlegt reyndist að vekja heimasætuna í morgun og var hún því heima hjá pabba sínum í dag, svona til að jafna sig. Leikskóli á morgun, og verður vonandi mikið fjör, enda stúlkan alltaf að biðja um "krakka krakka"
Nóg í bili, reyni að skrifa nokkuð reglulega næstu daga - ég veit að Fríða mín mamman hennar Maríu Dísar skoðar okkur alltaf af spítalanum og vonast eftir nýjum póstum - rétt eins og ömmurnar okkar yndislegu.
Toodiloo!

PS Við biðjum alla að hugsa fallega til Maríu Dísar sem fer aftur til Boston í fyrramálið - í þriðja sinn á stuttri ævi. Hún er hetjan okkar!

Öppdeit

Fjölskyldan fór Norður í Ærlækjarsel um daginn, eins og sjá má á myndasíðunni hennar Iðunnar. Það var yndislegt eins og alltaf að koma norður í Sel, og svo fékk Helgi að fara sína fyrstu ferð á Sléttuna, og yfir Öxarfjarðarheiði. Annars höfum við lítið farið þar sem vinnuálag foreldranna í sumar býður ekki upp á marga frídaga.
Fram undan er brjáluð vinnuvika hjá Eplamömmu - 14 fyrirlestrar á einni viku, allir um efni sem hún kann ekki og hefur aldrei lært, og helmingurinn enn óskrifaður. En með hjálp Helga og góðra kvenna ætti það þó að takast. 31.ágúst förum við svo til Englands - Iðunn og Una koma svo aftur 10 dögum síðar til að eiga hálfan mánuð enn á landinu góða, en Helgi verður eftir í Englandinu.
Næsta blogg líklegast í Englandsferðinni....

Íslandssumar

Hér hefur lítið verið bloggað, og líklegt að fátt verði um færslur næstu vikur þar sem eplin eru öll komin til eikarinnar - allir heima á Íslandi og lífið bara yndislegt. Við setjum samt alltaf inn myndir á myndasíðuna sem linkað er á hér til hliðar. Fyrstu helgina okkar heima var mikið prógram - fyrst ættarútilega Bótarættar á laugardag (við lágum ekki úti en fórum heim eftir kvöldgrillið), og svo tiltekt í Siggubústað við Þingvallavatn á sunnudegi, ásamt skemmtilegu fólki. Lítið er til frásagnar í þessari viku - við Iðunn höfum hitt ansi marga, og suma, eins og Friðrík Ólaf Guðmundsson Briem, í fyrsta sinn. Svo fór Iðunn í 18 mánaða skoðun í gær (aðeins of sein) og mældist 10,1kg og 80cm 19 1/2 mánaða gömul. Skoðunninni fylgdi sprauta, en sprautunni fylgdi enginn grátur, og bara eintóm gleði - svona er Iðunnin mikið hörkutól!

Lasin Iðunn...

...á leiðinni heim!
Iðunn er lasin. Með smá nefrennsli en aðallega háann hita sem enginn veit hvað veldur. Vonandi verður hann horfinn á morgun þegar við hefjum ferðalagið heim. Daníel skutlar okkur á lestarstöðina - þaðan lest til Kings Cross, neðanjarðarlest til Victoriu stöðvarinnar og lest þaðan á Gatwick. Þar munum við gista á Premier Inn og halda svo áfram til Íslands um hádegið á mánudag. Við getum ekki beðið eftir að komast heim!...en kvíðum svoldið ferðalaginu...
Hittumst heima!

Loksins loksins

...loksins erum við á leiðinni heim. Áætluð lending mánudaginn 13/7 rétt fyrir tvö eftir hádegi.....og verðum meira og minna heima í 11 vikur. Lífið gerist ekki betra!

Bómullardagur grasekkju og ekkills

Í dag halda eplahjónin upp á tveggja ára brúðkaupsafmæli! Tvö ár liðin síðan við giftum okkur Í Durham kastala, en samt er eins og það hafi gerst í gær - þó margt hafi reyndar á daga okkar drifið síðan.
Verra er að ég mun halda upp á daginn heima með Iðunni, en Helgi verður á fundum í allan dag, svo forritunarmatarboði í York og loks gistir hann á Bed and Breakfast aleinn og fjarri fjölskyldunni í nótt. Ófremdarástand!

Borta bra men hemma bäst

Eplafamilían er komin heim í Victoria Road, eftir skemmtilega heimsókn til Skandinavíu. Litla daman var ekki lengi að koma réttri mynd á stofuna - kubbar útum allt gólf og allt á hvolfi!

Danmerkurferðir

Við breikkuðum aðeins sjóndeildarhringinn síðustu daga og héldum til Danaveldis. Í gær fórum við til Höllu frænku í Hvalsö þar sem vel var tekið á móti okkur að vanda - Iðunni fannst ofsalega gaman að hitta Höllu, og ekki spillti fyrir að fara þaðan með fiðrildakjól og lítinn Lubbahund.
Við Helgi vorum reyndar að undrast hve margir voru á leið í ferðalag með bakpoka fulla af bjór og skildum ekkert í þessum þorsta lestarferðalanga fyrr en loks rann upp fyrir okkur ljós að þessa helgi er víst einhver pínulítil tónlistarhátíð í Hróarskeldu, rétt hjá Höllu.....


Í dag vörðum við deginum í Köben, hittum þar Binna og systur hans, og sátum í sólinni og drukkum Tuborg og hvítvín. Helgi var svo heppinn að komast á ofurútsölu í Illum þar sem biðu hans Paul Smith ullarjakkaföt á 70% afslætti sem alveg smellpössuðu á eplapabba. Á sömu útsölu náði Iðunn sér í Okker Gokker pollagalla fyrir næsta vetur - þau verða klárlega best klædda fólkið í Barnard Castle í haust.

Góður dagur, en allir lúnir!

Strandfjölskyldan á ströndinni

Hér er enn alveg yndislegt veður, næstum of heitt! Hitinn í dag fór upp í tæp 30 stig, blankalogn og skínandi sól, og þá er bara eitt í stöðunni: að skella sér á ströndina! Þannig að í dag og í reyndar líka í gær eyddum við eftirmiðdeginum á ströndinni í Bjarret. Veslings Helgi var reyndar fastur heima í vinnu og á fundum báða dagana, en hann var kannski bara feginn að fá smá rólegheit. Bjarret varð fyrir valinu þar sem Tina stjúpsystir mín býr þar, og ströndin er barnvæn og afskaplega grunnt langt langt útí sjó. Iðunni þótti ströndin algjört æði! Risastórt bað með endalausu vatni, og þar að auki krakkar til að leika sig við.
Spáð góðu næstu daga og á morgun skreppum við til Höllu frænku.