Nú andar suðrið sæla...

Enn er sumarveður, allir orðnir hressir og mikil tilhlökkun að komast heim til Íslands á morgun. Í dag tókum við daginn snemma og þrifum húsið hátt og lágt og þvoðum 3 þvottavélar til þess eins að geta slappað af í garðinum það sem eftir var dagsins. Mmmmmmmm sól og 24 stiga hiti - ekkert slor! Daníel kíkti í heimsókn til okkar á bílnum sem gengur ýmist undir nafninu Íþróttabíllinn eða (þegar Una talar um hann) hárgreiðslubíllinn. Nú er hann orðinn svo ráðsettur að til stendur að selja skrjóðinn svo Iðunn notaði tækifærið og þóttist vera blond beib í framsætinu...á kyrrstæðum bílnum, svona ef einhver undrast bílstólaleysi á myndunum.
Á morgun ætlar Daníel svo að skutla okkur til Darlington, þaðan tökum við lest til Glasgow þar sem til stendur að hitta McMagga sem var með Helga í verkfræðinni, og svo er flug heim um kvöldið. Hann Bjössi mágur minn er svo yndislegur og ætlar að sækja okkur á Keflavík, enda verðum við eflaust orðin lúin annað kvöld eftir heils dags ferðalag.

Afmælisdagur

Helgi átti góðann afmælisdag. Fyrst færðum við Iðunn honum kort og kaffi í rúmið og sungum fyrir hann afmælissönginn ansi rámum rómi eftir öll veikindin. Þar næst héldum við til Durham. Í Durham fékk Iðunn að hitta nýja deildarhundinn, sem heitir Poppy og er 8 vikna gamall míní pulsuhundur.....rosalega sæt, en Iðunni þótti perlufesti eigandans mun meira spennandi...líklega vegna þess að Poppy sat bara í makindum í fangi eiganda síns og Iðunn hélt hana líklega hluta af almennum líkamsfellingum hennar....
Við fengum okkur hádegispikknikk við rústir Finchale Priory, og svo héldum við snemma heim og eyddum nokkrum tímum í garðinum. Veðurguðirnir voru hliðhollir Helga og afmælisveðrið því sem pantað - 22C og sól og blíða. Um kvöldið fór Iðunn svo í sína fyrstu pössun síðan við fluttum aftur til Englands. Hún var í 3 tíma hjá Donnu í góðu yfirlæti. Við gátum samt varla annað en brosað að stelpunni okkar þegar hún var tilbúin í pössunina - sposk í náttfötum með Pippa upp á arminn og sængina með í för og brunaði þannig í gegnum bæinn í Silfurkrossinum góða alla leið til Donnu.
Við Helgi fórum sem sagt út að borða tvö ein í fyrsta sinn í 7 1/2 mánuð og nutum vel.....pöntuðum okkur rauðvín með matnum og töluðum saman um fullorðins málefni. Þegar við fórum svo að sækja barnið fundum við Donnu út á götuhorni með Iðunni í vagninum á leið í rökkurgöngu - hún hafði sofnað sæl en undrast foreldraleysið þegar hún hrökk upp aftur og Donna því á röltinu til að fá hana til að sofna aftur. En sem sagt allt gekk vel: barnið sælt, foreldrarnir glaðir og Helgi ánægður með daginn sinn. Við töltum svo heim í ljósaskiptunum með náttfataklædda stelpu í vagni, sumarklædd og hamingjusöm í 20C.

Til hamingju með daginn elsku Helgi okkar!

Í dag 23.júlí á Helgi Pétur pabbi Iðunnar 32 ára afmæli. Helgi er náttúrulega allra besti pabbinn, alltaf til í að skemmta stelpunni sinni og fer fyrstur með henni á fætur á hverjum einasta morgni, jafnvel þegar hún vaknar klukkan 06.00! Fáir hefðu nú trúað því fyrir nokkrum árum! Helgi er líka yndislegur eiginmaður og sálufélagi, sem elskar okkur báðar og er óhræddur við að sýna okkur það. Það er ótrúlegt að hugsa til þess að á einungis tveimur árum höfum við kynnst, gift okkur, eignast yndislega dóttur, og bætt líf okkar beggja á svo margvíslegan hátt að ekki er hægt að telja allt til. Ég þakka bara fyrir að hafa þegið boðið í sextugsafmæli Siggu "fairygoodmother"Sig., og hitt þar þennan prýðispilt - ég man enn hvað ég var hissa þegar ég komst að því að hann væri á lausu!

En sem sagt: Til hamingju með afmælið elsku Helgi okkar. Við erum svo heppnar að þú sért pabbinn, eiginmaðurinn og ofureplið á þessu heimili.
Una og Iðunn
xxx

Gönguferð

Hér er ástandið enn ekki alveg orðið gott, Helga og Iðunni virðist hægt og sígandi vera að batna, en ég er enn heldur slöpp með hita og kraftlítil. Það var kannski ekki mjög sniðugt að fara í sveitagöngu í dag, en allir voru hitalausir í morgun (enginn hefur í raun fengið hita nema ég - heppna ég!), og Iðunn búin að vera eldhress í sjálfri sér allan tímann, og ég bara varð að komast út. Allir voru því dúðaðir í ensku sumarfötin (flíspeysur, húfur, treflar!) og haldið af stað. Fyrir valinu varð mjög auðveld gönguleið ofar í dalnum - hún fer eftir gömlum lestarteinum og er því rennislétt nánast alla leið. Samt varð ég allt of þreytt undir lokin og eftir keyrsluna heim varð ég að skríða undir sæng með hitaskjálfta og beinverki - ekki gaman. En ég er nú að vona að þessu fari að ljúka og ætla að fara snemma að sofa í kvöld. Ég verð samt að viðurkenna að það var yndislegt að komast út í frískt loft og ganga nokkra kílómetra, og náðum meira að segja að fá smá sól á andlitið á milli regnskúra og vindhviða!

Ófremdarástand

Heilbrigðisástand heimilisins er ekki nógu gott sem stendur. Iðunn náði sér í smá hósta í Vínarborg en síðan við komum heim hefur hann ágerst og er hún nú komin með slím í lungun, nefrennsli, hósta sem fær hana til að kúgast og almenna vanlíðan - enginn hiti sem heita má þó, svo doktorinn dóttir tveggja lækna heldur enn að óþarfi sé að fara með barnið til læknis og dæla hana fulla af lyfjum - hér er bara treyst á "guð", lukkuna og lækningamátt tímans. Við fullorðna fólkið höfum sloppið aðeins betur, með hálsbólgu, hósta og ógeð í lungunum. Þó Iðunn sé lang veikust á Helgi þó lang mest bágt, eins og oft vill vera...ég held að fyrirbærið heiti man-flu hér í UK. Iðunn er í raun bara furðu spræk, þrátt fyrir vanlíðan og svefnleysi. Við vonum að allar lumbrur hafi verið gerðar brottrækar héðan af bæ eftir viku þegar við höldum heim á leið - viljum ekki draga einhvern Vínarhósta heim í fríska loftið á Fróni!
Kær kveðja úr pestarbælinu....

Fráir faraldsfætur

Glöggir lesendur hafa ef til vill tekið eftir að nú er loks búið að kaupa miðana heim. Komum við til Íslands að kvöldi 27. júlí og verðum til 26.ágúst. Þann dag munum við svo fljúga til Berlinar og fara þaðan landleiðina til Greifswald þar sem Una á að halda erindi á tannrannsókna(!) ráðstefnu. Mun hún flytja heillandi fyrirlestur um tennur, rottur, Kyrrahafseyjar og fólksflutninga - jahíííí!
Af því að við þurfum að takmarka farangur ansi mikið vegna Þýskalandsferðarinnar auglýsum við hér með eftir einhverjum góðhjörtuðum lesenda sem gæti lánað okkur bílstól sem hentar lítilli ca.9kg píu á meðan við erum á Íslandi. Öll tilboð vel þegin.

Frónferð undirbúin

Hafinn er undirbúningur undir Íslandsferð með talþjálfun:

Una: Iðunn hlusta nú á mömmu - aaaaaaaaaaaammmaaaaa
Iðunn: da da da da da da da da
Una: aaaaaaaammmmmmmaaaaaaa
Iðunn: prrrrrrrrrrrrrrrrrrrrrrrrrrrrrrr
Una: ok einu sinni enn - aaaaaaammmmmmmaaaaaa
Iðunn: nei nei nei nei nei
Una: ok Iðunn við verðum að ná þessu á næstu dögum, prófum aftur: aaaaaaaaaaaammmmmaaaaaaa
Iðunn: nana na na dadadadada prrrrrrrrrrrrrrrrrrrrrrrrrrrr
Una: OK alveg að koma...prófum aftur á morgun......

Ljúft

Það er fátt betra en að koma heim eftir langan vinnudag og setjast út í garð í kvöldsólinni með stelpu sem er svo hamingjusöm að fá mann heim; frábæran súpersexí eiginmann sem er búinn að þvo 2 þvottavélar; og rauðvínsglas! Allt í einu gleymist hvað var rosalega leiðinlegt í vinnunni!

Rólegheit

Hér hefur lítið verið gert um helgina annað en sofa, hvíla sig, elda mat og borða hann. Við vorum öll svo lúin eftir keyrsluna í síðustu viku að við ákváðum að taka lífinu með ró, enda veðrið hálf leiðinlegt, þó sólin léti sjá sig seinni partinn í dag. Iðunn virðist ætla að detta inn í gömlu rútínuna sína án mikilla vandkvæða, en hefur samt sofið meira en venjulega og drukkið ansi mikið - eins og hún sé að vinna sig upp eftir hitann í síðustu viku. Vinna á morgun fyrir húsmóðurina og svo ekki nema tæpur hálfur mánuður þar til við förum heim til Íslands - jibbiii jeiiii!

Komin heim

Þá erum við loksins komin heim eftir vel heppnaða ferð til Vínar. Yndislegt veður allan tímann - aðeins of heitt fyrir Iðunni reyndar svona alveg fyrst (um og yfir 30C), en við pössuðum hana vel og gáfum vel að drekka og seinni part vikunnar var svona 26-28 stiga hiti sem átti vel við okkur öll. Mikið var reiknað, eins mikið skrafað og næstum öll kvöld var farið út að borða með misstórum hópum gamalla vina og nýrra. Allir lærðu eitthvað nýtt og allir á ráðstefnunni voru sammála um að Iðunn væri langskemmtilegasta, flottasta og stilltasta stelpan á svæðinu - hún var reyndar eina stelpan á svæðinu undir 25 ára aldri! Ein vinkona mín í Vín hafði eignast strák síðan ég kom þangað síðast svo við Iðunn vorum með þeim einn eftirmiðdag til tilbreytingar og Iðunn var afar hrifin af Alexander, enda þykja henni allir krakkar æðislega skemmtilegir. Tristan, 4 ára strákur Valdísar (Guðmundsdóttur, doktorsnema í París) var líka voða vinsæll enda var hann afskaplega hrifinn af Iðunni og hafði gaman af að spila með hana og keyra hana í kerrunni. Svo fékk Sonja doktorsnemi í Vínarborg að nota mynd af Iðunni í doktorsverkefnið sitt, svo hún er strax orðin hluti af vísindaheiminum, ekki nema 7 mánaða gömul!
Við komum loksins heim í hús um klukkan 23.30 eftir ansi langt ferðalag (m.a. 5 tíma bið á Schiphol) og erum öll ansi lúin - Helgi og Iðunn eru bæði sofandi sem stendur.....ég hugsa að við notum helgina til gera sem minnst og ná okkur eftir ferðalagið!